АРИУН ЭЦЭГ ПАП ФРАНЦИСЫН ЗАХИАС ҮГ

ДӨЧ ХОНОГИЙН ЦАГ УЛИРАЛ, 2022 он

Сайныг үйлдэхдээ зүрхшээхгүй байцгаая. Учир нь хэрэв бид шантрахгүй байвал цаг нь болохоор хурааж авна. Тиймээс бид боломж завшаантай байх үедээ бүх хүнд, юуны түрүүнд итгэлийн гэр бүлийн гишүүдэд сайныг үйлдэцгээе. (Галат 6:9-10)

Хайрт ахан дүүс нараа,

Дөч хоногийн цаг улирал нь биднийг Есүс Христийн үхэл ба амилалтын Дээгүүр өнгөрөхийн нууцад хөтөлдөг тул хувь хүний болоод олон нийтийн шинэчлэлтийн зохистой үе билээ. 2022 оны Дөч хоногийн цаг улирал аялалдаа Паул гэгээнтний Галатуудад хэлсэн “Сайныг үйлдэхдээ зүрхшээхгүй байцгаая. Учир нь хэрэв бид шантрахгүй байвал цаг нь болохоор хурааж авна. Тиймээс бид боломж завшаантай байх үедээ бүх хүнд, юуны түрүүнд итгэлийн гэр бүлийн гишүүдэд сайныг үйлдэцгээе” сургаалыг тунгаан бодох нь зүйтэй.

1. Тариалах ба хураах

Элч эдгээр үгсээр Есүст үр тариа тарих, хураах дүр зургийг санагдуулдаг (Матай 13). Паул гэгээнтэн бидэнд кайросын (kairós)  тухай ийн ярьж байна: ирээдүйн ургацыг харах үүднээс сайн сайхныг тарих зохистой цаг үе. Бидний хувьд энэ “зохистой цаг үе?” гэж юу вэ? Дөч хоногийн цаг улирал бол үнэхээр тохиромжтой цаг үе ба энэ нь ямар нэгэн байдлаар дүрсэлсэн бидний оршин тогтнол билээ. [1]  Бидний амьдралд шунал, бардамнал, эзэмших болон хуримтлуулах хүсэл, эдэлж хэрэглэх эрмэлзэл давамгайлж байдгийг Сайн мэдээний сургаалт үлгэр дэх тэнэг хүний түүхээс харж болно. Тэрээр амь насаа аюулгүй, найдвартай гэж бодож арвин их үр тариа, эд хөрөнгөө амбаартаа хадгалсан байсан (Лук 12:16-21). Дөч хоногийн цаг улирал биднийг сэтгэлийн болоод сэтгэлгээний өөрчлөлтөд урьдаг бөгөөд ингэснээр амьдралын үнэн, гоо үзэсгэлэн нь хэр их өгөх, эзэмших, хуримтлуулахаас биш сайн сайхныг тариалах болон хуваалцах байдлаас олдох болно.

Агуу их өгөөмөр сэтгэлээр хамгийн эхэнд “манай хүн төрөлхтний гэр бүлд сайн сайхны арвин үрийг үргэлжлүүлэн тарьж суулгадаг” (Фрателли Тутти, 54) нь Тэнгэрбурхан өөрөө юм. Дөч хоногийн цаг улирлын үеэр бид Тэнгэрбурханы “амьд бөгөөд идэвхтэй” (Евр 4:12) үгийг хүлээн авснаар Тэнгэрбурханы билиг хишгийг хүлээн авахад дуудагддаг. Тэнгэрбурханы үгийг тогтмол сонсох нь биднийг Түүний ажил үйлсэд нээлттэй, дуулгавартай болгодог ба (Иак 1:21) мөн бидний амьдралд үр жимсийг өгдөг. Энэ нь бидэнд агуу баяр баясгаланг авчирдаг. Цаашлаад биднийг Тэнгэрбурханы хамтран зүтгэгчид болоход уриалдаг (1Кор 3:9). Одоогийн цаг үеийг сайн ашигласнаар (Еф 5:16) бид ч бас сайн сайхны үрийг тарьж болно. Сайн сайхныг тарих энэхүү дуудлагыг ачаа дарамт мэтээр харах биш харин хишиг ивээл гэж үзэх ёстой бөгөөд үүгээр Бүтээгч биднийг өөрийн өгөөмөр сайн сайхандаа идэвхтэй нэгдэхийг хүсдэг.

Ургац хураалтын хувьд яах вэ? Бид ургац хураахын тулд үр тарьдаггүй гэж үү? Мэдээжийн хэрэг! Паул гэгээнтэн: " Хармыг тарьдаг хүн хармыг хураана. Өгөөмрөөр тарьдаг хүн өгөөмрөөр хураана" (2 Коринт 9:6) гэж хэлэхдээ тариалалт ба хураах хоёрын нягт уялдаа холбоог онцолсон байдаг. Гэхдээ бид ямар ургацын тухай ярьж байна вэ? Бидний тарьсан сайн сайхны анхны үр жимс нь бидний дотор, өдөр тутмын амьдралд, тэр байтугай бидний өчүүхэн нинжин сэтгэлийн үйлдлүүд дээр гарч ирдэг. Тэнгэрбурханд өчүүхэн ч гэсэн хайрын ямар ч үйлдэл, ямар ч “өгөөмөр чармайлт” хэзээ ч алга болохгүй (Evangelii Gaudium, 279). Бид модыг үр жимсээр нь таньдаг шиг (Матай 7:16,20) сайн үйлсээр дүүрэн амьдрал гэрэл цацруулдаг (Матай 5:14-16) ба Христийн анхилуун үнэрийг дэлхийд авчирдаг (2 Кор 2:15). Тэнгэрбурханд гэм нүглээс ангид үйлчлэх нь бүхний авралын төлөө ариусгах үр жимсийг авчирдаг (Ром 6:22).

Сайн мэдээний Айлдлын “нэг нь тарьж, нөгөө нь хураана” (Иохан 4:37) гэсэн зүйр үгийн дагуу үнэндээ бид тарьсан үрийнхээ багахан хэсгийг л хардаг. Бусдын тусын тулд тариалахдаа бид Тэнгэрбурханы өөрийнх нь энэрэнгүй сэтгэлийн хайранд хуваалцдаг. “Бидний тарьсан сайн сайхны үрийн далд хүчинд итгэл найдвараа тавьж, улмаар үр жимсийг нь бусад хүмүүс хурааж авах үйл явцыг эхлүүлэх нь үнэхээр эрхэм юм. (Фрателли Тутти, 196). Бусдын тусын тулд сайн сайхныг тариалах нь биднийг хувийн явцуу ашиг сонирхлоос ангижруулж, бидний үйлдлүүдийг өртөггүйгээр шингээж, Тэнгэрбурханы энэрэнгүй төлөвлөгөөний гайхамшигт хэтийн төлөвт нэг хэсэг болгодог.

Тэнгэрбурханы үг бидний алсын харааг өргөжүүлэн дээшлүүлдэг. Энэ нь жинхэнэ ургац бол эсхатологи, сүүлчийн ургац, мөнх бус өдөр гэдгийг бидэнд хэлдэг. Бидний амьдрал болоод бидний үйлдлийн боловсорч гүйцсэн үр жимс бол “мөнхийн амьдралын үр жимс” (4:36-д), бидний “тэнгэр дэх эрдэнэ” (Лук 12:33; 18:22) юм. Үр жимс ургуулахын тулд газар дахь үр үхдэг тэрхүү дүр зургийг Есүс үхэл ба амилалтын нууцын бэлгэдэл болгон ашигладаг (Иохан 12:24). Паул гэгээнтэн бидний бие махбодын амилалтын тухай ийн ярьдаг “Энэ нь муудах байдал дотор таригдаж үл муудах байдал дотор амилуулагдана. Энэ нь үл хүндлэл дотор таригдаж алдар дотор амилуулагдана. Энэ нь мөхөс байдал дотор таригдаж хүч дотор амилуулагдана. Энэ нь төрөлх биеэр таригдаж сүнслэг биеэр амилуулагдана.   (1Кор 15:42-44). Амилалтын итгэл найдвар бол амилсан Христийн дэлхийд авчирдаг агуу гэрэл. “Хэрэв бид зөвхөн энэ амьдралдаа Христ дотор найдсан бол бид бүх хүмүүсээс хамгийн өрөвдөлтэй нь болно. Харин чухамдаа Христ үхэгсдээс амилуулагдсан бөгөөд нойрсогсдоос анхны үр жимс мөн (1 Кор 15:19-20). "Түүний үхэлтэй адил байдалд" (Ром 6:5) Түүнтэй хайр энэрэлээр холбогдсон хүмүүс мөнх амьдралын төлөө Түүний амилалттай ч холбогдох болно (Иохан 5:29). "Тэгэхэд зөвт хүмүүс нь Эцэгийнхээ хаанчлалд нар мэт гийх болно" (Матай 13:43).

2. "Сайн үйл хийхээс татгалзахгүй байцгаая"

Христийн амилалт нь бидний өнөөгийн цаг үед авралын үрийг тарьж, мөнх амьдралын “агуу их итгэл найдвар”-аар жирийн амьдралын итгэл найдварыг сэргээдэг (БЭНЭДИКТ XVI, Cпе Салви, 3; 7). Итгэл найдвар тасарсан мөрөөдөлд маш ихээр урам хугарах, тулгарч буй сорилтонд гүн санаа зовних, нөөц баялгийнхаа ядууралд урам хугарах зэрэг нь биднийг хувиа хичээх, бусдын зовлон шаналалд хайхрамжгүй хандах авралыг эрж хайхад уруу татагдахад хүргэдэг. Үнэн хэрэгтээ бидний хамгийн сайн нөөц бололцоо хүртэл хязгаарлагдмал байдаг: “Залуу хүн ч ядарч сульдан, идэр хөвгүүд ч бүдэрдэг” (Ис 40:30). Мөн Тэнгэрбурхан “ядарсанд тэнхээ өгч, чадал дутагдсанд нь хүч нэмдэг... Эзэнд найдагчдын хүч нь шинэчлэгдэнэ. Тэд бүргэд мэт жигүүр дээрээ элин халина. Тэд гүйхдээ үл ядран, алхахдаа үл цуцна” (Ис 40:29, 31). Дөч хоногийн цаг улирал биднийг Эзэнд итгэл бишрэл, итгэл найдвараа өгөхөд дууддаг (1Петр 1:21). Учир нь хэрэв бид амилсан Христ рүү хараагаа чиглүүлэх юм бол (Евр 12:2) Элчийн "Сайныг үйлдэхдээ зүрхшээхгүй байцгаая" (Гал 6:9) хэмээх хандлагад хариу үзүүлэх боломжтой болно.

Залбирахаас залхахгүй байцгаая. Есүс бидэнд “сэтгэл алдрахгүйгээр байнга залбир” гэж заасан (Лук18:1 ). Тэнгэрбурхан бидэнд хэрэгтэй учраас бид залбирах хэрэгтэй. Бидэнд биднээс өөр юу ч хэрэггүй гэж бодох нь аюултай хуурмаг зүйл. Хэрэв цар тахал бидний хувийн болоод нийгмийн эмзэг байдлын тухай ойлголтыг нэмэгдүүлсэн бол энэхүү Дөч хоногийн цаг улирал бидэнд Тэнгэрбурханд итгэх итгэл бишрэлээр хангагдсан тэрхүү тайтгарлыг мэдрэх боломж олгох болтугай (Ис 7:9). Бид бүгд ижил нэг завин дээр, түүхийн шуурган дунд байгаа учир хэн ч ганцаараа авралд хүрдэггүй. [2] Тэнгэрбурхангүйгээр хэн ч авралд хүрэхгүй нь дамжиггүй. Есүс Христийн Дээгүүр өнгөрөхийн нууц үхлийн хар усыг ялан дийлдэг. Итгэл бишрэл нь амьдралын ачаа дарамт, зовлон шаналалаас биднийг харамлаж гамнадаггүй. Харин Ариун Сүнсээр дамжуулан бидний зүрх сэтгэлд цутгасан Тэнгэрбурханы хайр энэрэлийг урам хугалахгүй агуу их итгэл найдвараар Христ доторх Тэнгэрбурхантай нэгдэн нүүр тулах боломжийг бидэнд олгодог (Ром 5:1–5).

Амьдралаасаа хорон мууг арилгахаас залхахгүй байцгаая.  Гэм нүглийн эсрэг тэмцэлд амин сүнсээ бэхжүүлэхэд Дөч хоногийн цаг улирал биднийг дуудаж байгаачлан биеийн мацаг барих болтугай. Тэнгэрбурхан уучилж өршөөхөөс хэзээ ч залхдаггүй гэдгийг мэдэж, Наманчлал ба Эвлэрлийн Үндсэн ёслолоор уучлал өршөөл гуйн залбирахаас залхахгүй байцгаая.  

[3] Хувиа хичээх, хорон муу бүхнийг өдөөгч, түүхэн замналд эрэгтэй, эмэгтэй хүмүүсийг гэм нүгэлд татах олон янзын арга замыг олдог бүгдийн эсрэг тэмцэхээс залхахгүй байцгаая (Fratelli Tutti, 166). Эдгээрийн нэг нь бол хүмүүсийн харилцааг доройтуулж байдаг дижитал мэдээллийн хэрэгсэлд донтох донтолт юм.

Дөч хоногийн цаг улирал бол эдгээр уруу таталтыг сөрөн зогсох, нүүр тулан болон биечлэн уулзах “үнэн сэтгэлийн бодит уулзалт”-аас бүрдсэн хүний харилцааны салшгүй хэлбэрийг хөгжүүлэхэд тохиромжтой цаг юм.

Хөршүүд рүүгээ чиглэсэн идэвхтэй буяны үйлсэд сайн үйл хийхээс залхахгүй байцгаая. Дөч хоногийн энэ цаг улирлын үеэр бид баяр хөөртэйгөөр бусдад гар сунгахыг хичээцгээе (2 Кор 9:7). “Тариачинд тарих үрийг, идэх хүнсийг бэлдэн өгдөг” (2 Кор 9:10) Тэнгэрбурхан бидэнд зөвхөн идэх хүнсээр зогсохгүй мөн бусдад сайныг үйлдэх өгөөмөр сэтгэлтэй байх боломжийг олгодог. Сайн сайхныг тариалах бүхэл бүтэн амьдрал бидэнд байгаа нь үнэн хэдий ч ойрын хүмүүстээ халамж анхаарал тавих, амьдралын зөрөг замд шархалсан ахан дүүс нартаа гар сунгах Дөч хоногийн цаг улирлын онцгой давуу талыг ашиглацгаая ( Лук 10:25-37). Дөч хоногийн цаг улирал бол тусламж хэрэгтэй хүмүүсийг - эрж хайх, татгалзахгүй байх, хүнлэг энэрэнгүй сонсгол, сайн үг хэрэгтэй хүмүүст - гар сунгах, үл тоомсорлохгүй байх, ганцаардсан хүмүүст - зочилж очих, хаяж орхихгүй байх зохистой цаг үе юм. Бүгдэд сайныг үйлдэх дуудлагаа амьдралд хэрэгжүүлэн ядуу дорд болон тусламж хэрэгтэй хүмүүсийг, орхигдсон, үл зөвшөөрөгдсөн, ялгаварлан гадуурхагдсан хүмүүсийг энэрэн хайрлахад цаг зав гаргацгаая. (Фрателли Тутти, 193 (Fratelli Tutti).

3. "Хэрэв бид бууж өгөхгүй бол цагтаа ургацаа хураана"

Жил бүрийн Дөч хоногийн цаг улирлын үеэр “хайр энэрэл, шударга ёс, эв нэгдлийн хамт сайн сайханд нэг дор бүгдэд нь хүрдэггүй. Тэдгээрийг өдөр бүр эргэцүүлэх ёстой байдаг” (мөн ижил 11). Бидэнд тариаланч хүний тэсвэр тэвчээрийг (Иак 5:7) хайрлаж, сайн үйлсийг нэг алхамаар тууштай хийхийг Тэнгэрбурханаас гуйн залбирцгаая. Хэрэв бид унах юм бол биднийг үргэлж өргөж байдаг Эцэг Тэнгэрбурханд гараа сунгацгаая. Хэрэв бид төөрөлдвөл, хорон муугийн уруу таталтанд төөрөлдвөл “уучлал өршөөлд энэрэнгүй” Тэнгэрбурхан руу эргэж очихдоо бүү эргэлз. (Ис 55:7). Тэнгэрбурханы хишиг ивээл болон Шашны нэгдлээр дэмжигдсэн өөрчлөлтийн энэ улиралд бид сайныг үйлдэхээс залхахгүй байцгаая. Мацаг барилтаар хөрсийг бэлтгэж, залбирлаар усалж, буяны үйлсээр баяжуулдаг. “Хэрэв бид бууж өгөхгүй бол ургацаа цагт нь хурааж авна” гэдэгт, мөн тэсвэр тэвчээрийн билиг хишгээр бид (Евр 10:36) өөрсдийн болон бусдын төлөөх авралыг авна гэдэгт бат итгэцгээе (1 Тим 4:16).  Хүн бүрд ахан дүүсийн хайр энэрэлийг суулгаснаар бид бидний төлөө амиа өгсөн Христтэй нэгддэг (2 Кор 5:14-15). “Бүх юмс” Тэнгэрбурханы эрхшээлд орох үед тэнгэрийн хаанчлалын баяр баясгаланг урьдчилан мэдрэх боломж бидэнд олгогддог (1 Кор 15:28).

Аврагчийг хэвлийдээ тээж “энэ бүхнийг зүрхэндээ тунгаан бодсон” (Лук 2:19) Цэвэр Охин Мариа бидэнд  тэсвэр тэвчээрийн билиг хишгийг хүргэх болтугай. Тэр бидэнд эхийн оршихуйгаараа түшиг болох болтугай. Ингэснээр өөрчлөлтийн энэ улирал мөнхийн авралын үр жимсийг авчрах болно.

 

Ром хот, Жон Латеран гэгээнтэн, 2021 оны 11-р сарын 11, Хамба лам Мартин гэгээнтний дурсгал.